اختيار المكتب العقاري الصح بيوفّر عليك وقت ومصاري ووجع راس. وبما إنو أغلب الشغل بسوق العقارات عنا بيمشي بالثقة والكلمة، منحب نعطيك شوية علامات بتساعدك تميّز المكتب الجدّي من غيره.
1. شوف إذا المكتب موثّق
الشارة الفيروزية جنب اسم المكتب على دلّالك بتعني إنو فريقنا شاف السجل التجاري ورخصة مزاولة المهنة وهوية صاحب المكتب، واتصل فيه. هاد ما بيعني إنو كل مكتب مو موثّق سيّئ، بس بيعطيك خطوة أمان زيادة.
2. اسأل عن العمولة من الأول
المكتب المحترم بيحكيلك عن نسبة العمولة ومين بيدفعها قبل ما يفرجيك أي عقار. إذا حسّيت إنو الموضوع عم يتأجّل أو «منتفاهم بعدين»، اطلب يكون الحكي واضح ومكتوب.
3. انتبه للعروض الأحلى من اللازم
شقة بالمزة بنص سعر السوق؟ غالباً في شي ناقص: الأوراق، أو الإكساء، أو العقار أصلاً مو متاح. اسأل كتير ولا تحوّل أي عربون قبل ما تشوف الأوراق.
4. تعرّف على الدلّال بالاسم
المكاتب يلي بتعرض دلّالينها بأسمائهن وصورهن على دلّالك عادةً بتكون أوضح بتعاملها. حكي مع شخص بتعرف اسمه وخبرته أريح بكتير من رقم مجهول.
5. خلّي كل شي مكتوب
من وصل العربون لعقد الإيجار أو البيع، كل اتفاق لازم يكون على ورق وبتوقيع الطرفين. هيك بتحمي حقك وحق المكتب.
وإذا صادفت معلومة غلط عن أي مكتب على دلّالك، راسلنا ومنراجعها.